Og svo tjöllum við okkur í rallið : Bókin um Thor

4.1/5 ( ratings)

Hann var með hausinn fullan af ótal hlutum og gat ekki munað eftir því að muna eftir öllu. Ég vissi ekki þá hvað það táknaði fyrir hann að vera með alla þessa hluti í hausnum …
Thor Vilhjálmsson var einn helsti rithöfundur landsins og þjóðkunnur sem einarður málsvari lista, menningar og mannúðar. Hann var líka óhemju svipsterkur og sópaði að sér athygli hvarvetna með öllu sínu fasi.
Sonur hans, Guðmundur Andri, hefur valið ljósmyndir úr fórum Thors til þess að minnast hans. Af næmi og listfengi dregur hann upp einstæða mynd af skapmiklum og flóknum manni sem oft átti í útistöðum við umhverfi sitt, en var jafnframt hlýr húmanisti sem lagði allt í sölurnar fyrir listina. Einlæg lýsing Guðmundar Andra á Thor og sambandi þeirra feðga er hjartnæm og minnisstæð.

* * * * *
„„Og svo tjöllum við okkur í rallið.“ Það er svo mikið í þessum orðum. Mikill Thor. Mikill leikur að tungumálinu og svo mikið blik í auga skapandi og frumlegs höfundar sem var oft langt á undan sinni íslensku samtíð. Svona verða fallegar minningar til og svona lifa þær … nálgunin er sérstæð, innileg og falleg … Það er ekki ofsögum sagt að það sé vandfundinn betri liðsmaður íslenskunnar og jafn vígfimur og lipur stílisti og Guðmundur Andri. Og svo tjöllum við okkur í rallið ber þess líka öll merki. Hér birtist Thor Vilhjálmsson lesendum með ótrúlega lifandi og skemmtilegum hætti … firnavel gert og skilar jafnframt skýrri og skemmtilegri mynd af Thor, samferðamönnum sem og tíðarandanum í íslensku lista- og menningarlífi … Og svo tjöllum við okkur í rallið er einstaklega vel heppnuð og falleg bók sem setur ferskan tón í ævisagnaritun á Íslandi.“
Magnús Guðmundsson / Fréttablaðið

* * * * 1/2
„Framúrskarandi vel lukkað og hjartnæmt verk … fallega hugsuð, og einstaklega fallega skrifuð … Óvenjuleg ævisaga og líklega einstæð hér á landi … Tvímælalaust ein af athyglisverðustu og bestu bókum ársins.“
Einar Falur Ingólfsson / Morgunblaðið

* * * * 1/2
„… sérlega falleg, persónuleg og vel skrifuð … ein besta bók Guðmundar Andra … Guðmundur Andri stílar hlýlega og mjúklega; hann er með þíðan og fallegan stíl … Mér finnst alltaf eins og hann sé að klappa mér með orðum þegar ég les hann því það er svo mikil blíða í textanum hans … lok bókarinnar gerðu það að verkum að ég lagði hana frá mér með öndina í hálsinum.“
Ingi Freyr Vilhjálmsson / Stundin

„Óskaplega innihaldsrík … Það besta sem Guðmundur Andri hefur gert og hefur þó gert margt gott. Skrifað af óskaplegri hlýju, hann færir okkur Thor alveg eins og við þekktum hann … Ég táraðist undir lokin …“
Kolbrún Bergþórsdóttir / Kiljan

„Thor stígur algjörlega ljóslifandi af þessum síðum … Algjörlega frábær bók!“
Egill Helgason / Kiljan

„Maður finnur fyrir nærveru Thors í þessari bók … þeirra samband er ofboðslega skemmtilegt … Það er í þessari bók einhver kjarni sem maður er oft að leita að í miklu stærri ævisögum.“
Haukur Ingvarsson / Kiljan

„Mikilvæg bók … Óhætt er að mæla með og gott betur.“
Birna Bjarnadóttir / Víðsjá

„Ævisaga ársins.“
Árni Matthíasson / Morgunblaðið

Höfundur: Guðmundur Andri Thorsson